काठमाडौं। बाँकेको पशु क्वारेन्टाइन कार्यालयले भारतीय नागरिकबाट कब्जा गरिएको आफ्नै भवन २५ वर्षपछि पुनः प्राप्त गरेको छ।
नेपालगञ्ज उपमहानगरपालिका–१५ स्थित पिप्रहवा क्षेत्रको होल्डिङयार्ड भित्र अवस्थित सो एक तल्ले भवनमा एक भारतीय परिवार बिनाअनुमति बसोबास गर्दै आएको थियो। पशु क्वारेन्टाइनले भवन खाली गर्न अनुरोध गरे पनि भारतीय परिवारले ध्यान नदिएपछि, वरिष्ठ पशु चिकित्सक डा. विनय कुमार कर्णले बाँकेको जिल्ला प्रशासनमा निवेदन दिए।
त्यसपछि, सात दिनको अल्टिमेटममा भवन खाली गरिएको छ। यसले पशु क्वारेन्टाइनले गुमाएको भवन पुनः प्राप्त गरी उक्त भवन जिम्मा लिएको छ, जसले कार्यालयको कामकाजलाई सहज बनाउने छ।
