सिमकोट गाउँपालिका पशु सेवा शाखाद्वारा हुम्लाको सदरमुकाम सिमकोटमा सञ्चालित २२ मासु पसल र एक एग्रोभेटको अनुगमन गरिएको छ ।
अनुगमनका क्रममा एक मासु पसल दर्ता नगरी सञ्चालन गरेको पाइएको र सात दिनभित्र दर्ता गर्न म्याद दिएको, यदि यो समयावधिमा दर्ता नभएको खण्डमा पसल बन्द गर्ने निर्णय भएको सिमकोट गाउँपालिका पशु सेवा शाखामा कार्यरत नायब पशु स्वास्थ्य प्राविधिक विष्णु बुमीले जानकारी दिए ।
दुई मासु पसलमा बिग्रिएको मासु भेटिएकाले उनीहरुलाई एकपटक सुध्रिने मौका दिएको र बिग्रिएको मासु बरामद गरी नष्ट गरिएको छ । यस्तै तीन नवीकरण नभएको, चार साइनबोर्ड नभएको र सात मासु पसलमा मूल्यसूची नभएको पाइएको उनले बताए ।
यी मासु पसल सञ्चालकलाई एक हप्ताभित्र सम्पूर्ण कागजात जुटाएर पसल सञ्चालन गर्न निर्देशन दिइएको छ । सिमकोटमा सञ्चालित एक मात्र एग्रोभेट अनुगमनका क्रममा राम्रो रहेको छ ।
अधिकांश मासु पसल अत्यन्तै फोहर र बासी कुहिएको मासु बिक्री तथा बधस्थल अधिकांश फोहर रहेको गुनासो आउन थालेपछि अनुगमन गरिएको गाउँपालिकाले जानकारी दिएको छ ।
अनुगमनमा सम्बन्धित मासु पसल सञ्चालकलाई ढक, तराजु नापतौल विभागमा नवीकरण गर्न, एप्रोन सफा हुनुका साथै मास्कको प्रयोग गर्न, मासु झिङ्गाले नभन्किने गरी जालीले छोपेर राख्न र मासु काट्न प्रयोग गरिने औजार, भाँडावर्तन सफा राख्न, मूल्यसूची राख्न र म्याद नाघेको मिति स्पष्ट देखिने गरी राख्न निर्देशन दिएको सिमकोट गाउँपालिका पशु सेवा शाखाका संयोजक महेन्द्रबहादुर शाहीले बताए ।
‘स्वच्छ मासु खाऔँ, स्वस्थ बनौँ’ भन्ने गाउँपालिकाको नारा रहेको उनले जनकारी दिए । नेपालगञ्ज र सुर्खेतबाट आउने मासु जाँचका लागि विहिबारदेखि सिमकोट विमानस्थलमा पशु सेवा शाखामा कार्यरत नायब पशु स्वास्थ्य प्राविधिक बुमी विमानस्थलमा बस्ने जानकारी पनि साेही अनुगमनकाे क्रममा बताइएको थियो ।
